Төслийн тухай

Нэгдсэн Үндэстний Байгууллага 2013 онд Мөнгөн усны тухай Минаматагийн конвенцыг боловсруулан баталсан бөгөөд энэхүү конвенц нь хүний үйл ажиллагаанаас үүдэлтэй мөнгөн ус болон түүний нэгдлийн ялгарал, хаягдлаас хүний эрүүл мэнд, байгаль орчныг хамгаалах үндсэн зорилготой. Монгол Улс 2015
онд тус конвенцод нэгдэн орсон. Даян дэлхийн байгаль орчны сангаас дээрх конвенцод нэгдэн орсон улс орнуудад алтны бичил уурхайд мөнгөн усны хэрэглээг бууруулахад дэмжлэг үзүүлэх зорилгоор “Даян дэлхийн урт хугацааны хөгжлийн боломжууд” буюу planetGOLD хөтөлбөрийг 5 жилийн хугацаатайгаар 8 улсад хэрэгжүүлж байна. Монгол Улс дахь planetGOLD төслийг Байгаль орчин, аялал жуулчлалын яам, НҮБ- ын Байгаль орчны хөтөлбөр, НҮБ-ын Аж үйлдвэрийн хөгжлийн байгууллага болон Канад Улсын Алтны бичил уурхайн зөвлөл хамтран хэрэгжүүлж байгаа билээ.

Төслийн зорилго

planetGOLD төсөл нь Монгол ба Филиппин улсуудад алтны бичил уурхайг албажуулахад хувь нэмэр оруулж, бичил уурхайчдыг мэргэшүүлэн, тэдэнд санхүүгийн боломж бий болгох, хариуцлагатай алтны зах зээлд оролцох, мөнгөн усгүй баяжуулах системд шилжих зэрэгт нь дэмжлэг үзүүлэн, дотоодод болон олон улсад мэдлэг, туршлагаа хуваалцах зорилготой.